Gabriele Ortu

Tui no ses torrau.

M’anti mandau una litera:
Disperso. Caduto per la libertà.

In logu disconnotu, fillu miu stimau,
t’at carrargiau sa nì.

Ignoto

Ant’ai scritu in d’una gruxi.

Non solu sa vida,
su nomini puru t’est mancau.

Tui no ses torrau.

Ne nomini ne sangunau
est aturau, fillu miu stimau.

Dì e noti, a manus ingruxadas,
mi seu carrigada de becesa
abetendu a fai nea, po ti biri.

Ma tui no s’est torrau.

Su capeddu di Alpinu,
cun sa pinna niedda,
ddu port’istrintu in su coru.

Ma chini at a pregai po tui,
cras, candu sa luxi
m’at a essi‘ negada?