Gabriele Ortu

Bai, amiga, bai,
cun is alas di amori,
e porta unu saludu
a is fillus de Sardigna
sparzinàus in su mundu
po unu arrogu ’e pani,
negau in domu insoru.

Bai, in logus trotus
de disisperu e amestura
fueddus de cuncordia
po is corus in turmentu.

Bai, a su fossu ’e Marcinelle,
a is sartus de nebida
de is pranuras lombardas,
a is fabricas de dolori.

Bai, amiga, bai,
in terra furistera,
e semina arregordus
di argiolas arriendu,
e cantus di amori,
po is corus emigraus.

Bai, cun su ’entu solianu
in tot’is àndalas de mundu
e semina cunfortu
po is fradis emigraus.
Bai… bai… bai,
cun sa bertula prena
de sonus e de cantus
de sa terra nosta amada,
e imprassa cussus fradis,
e poneddus in prexu
po chi pozant binci’
sa grandu maladia
chi portant in su coru,
is fillus de Sardigna.

Bai… bai, portanceddu
custu mengianu bellu de soli,
cun is fragus de Campidanu,
Barbagia, e Logudoru,
a is fillus de Sardigna.

Bai, cun bisus nous
prenus de trigu ingraniu,
e allui lantias de speras,
in is corus emigraus.

Bai… E no scarescias
cussu campusantu
senza soli e senza prantu.

Bai… E lassa una pregadoria
po cussu fradi sfortunau,
chi no podit torrari…